Tualchhung

Serchhipah hmun him reng a awm lo
Geology & Mining Wing-in tunhnaia Mizoram leilung dinhmun a zir chianna bu a tih chhuah, Geo-technical report-a a lan danin Serchhip leh Chhiahtlang khaw chhung hmun thenkhat chu rikrup thil thleng thei reng hmuna awm a ni a. A thlen thulha nunna chan hlauhawm rengna hmun anga ngaih a ni.
Rikrup thil thleng thut theiah In leh Lo, ran leh nunna chan hlauhawmna hmun Very high risk zone-ah chuan Serchhip tlaklam Highway, a bikin kawng thlang lam atanga New Serchhip thleng a ni a. Hmar Veng Mini Sports complex bul luite kam leh a fintu lui bawr bakah Roman Cotholic awmna tlang leh Serchhip Chanmari Veng chhim lam ruamte a tel a, Serchhip khawpui chu him lai tak tak a awm lo a ni.
Chhiahtlangah chuan very high risk zone a awm lona-in, a hmun a him lo hle bawk a. Chhiahtlang, kawngpuiin a tan tlangna chhim lam chu hmun him leh khaw zauhna atana thaa ngaih a ni.
School sports tan dawn
Vawiin atang hian Serchhip Field-II ah North Zone Middle School Sports neih tan a ni dawn.

Serchhipah kangmei ven hapta hawn a ni

Vawiin khan Serchhip Dist.Level Fire Prevention Committee buatsaihin DC’s Conference hall-ah ‘Kangmei ven hapta’ hawnna inkhawm neih a ni.
He inkhawmpui Pi K.Vanlalruati SDO(S) kaihhruaiah hian khuallian District Bawrhsap Pu H.Darzika chuan thu sawiin, Serchhip Dist.ah hian kangmei chhuak thelh kawngah Mizo tlawmngaihna kha chhawmnun zel nia a hriat thu a sawi a. Serchhip Dist. chu kangmei vengtha Dist. lawmman tum hnih lo dawng tawh a nih angin kumin pawh hian lawmman lak leh ngei tum a ni a ti.
Pu Darzika chuan Mizote chu khawsak phungah changkang tawh tak, ram changkang zawkte incheina leh hmanrua ang hmang mek ni mah ila, Lo vata hal kan la bansan hlei thei si lo chu inhmeh lo a tih thu sawiin, vanduai thila kangmei a lo chhuak a nih pawhin hmuhnawm thlira thlir lovin a thelhtu ah tan i tum theuh ang u tiin kalkhawmte chu a sawm a. Kangmei chhuak avanga chhiatna thleng thin, sorkar-in zangnadawmna a pek chu beitham tak, thil kangchhia nena a hlutna inmil lo tak a nih avangin kangmei chhuah loh hrim hrim hi a hlawk thlak fe zawk a ni a ti bawk.
He hunah hian Dist.Level Fire Prevention Committee Secretary Pu Lalthlamuana Pachuau, DFO Thenzawl chuan report pein, kangmei venna kawnga hmalakna tur hrang hrang – VC tlangau autir, School naupang hnenah inzirtirna pek, Ram tihkan khapna order chhuah leh Lo hal hun atan February thla chhung ruat a nih thute a tarlang a.
Pu H.Zonuntluanga Honarary Wildlife Warden, Serchhip Dist. pawhin ram kangin pawi a thlen thui zia bakah nungcha leh ramngaw humhalh a tul thu a sawi bawk.
He hapta hawnna inkhawmah hian Lalrempuia Chhiahtlang chuan zaia kalkhawmte awiin, Pu K.Lalchhunga RO Serchhip lawmthu sawiin inkhawm a tin a ni.

Tualchhung

Kangmei ven hapta hawng dawn
Vawiin chhun dar 12 hian DC’s conference hall-ah Fire Prevention week hawnna inkhawm neih a ni dawn. Kangmei venhapta hawnna inkhawm Pi K.Vanlal ruati SDO(Sadar) chuan kaihruaiin, District Bawrhsap Pu H.Darzika khuallian a ni ang a, Thenzawl DFO Pu Lalthlamuana Pachuau-in report a pe ang.
Serchhip-V VC a piang dawn ta
Serchhip-IV Village council atangin VC thar siam a nih dan tur nimin khan a huamchhunga VC, Political party, YMA leh LAD aiawh ten DC hovin a office-ah an sawi ho. VC thar piang tur hi P&E Veng behchhan niin, Serchhip-V Village Council tih a ni ang a, kumin April ni 5 khian inthlan a ni ang.
Serchhip-V VC member 4 awmna turah hian In 319 awmin, voter 978 a awm anga. Serchhip IV VC-ah member 6 awm zui tura rin niin, In 619-ah voter 2265 an awm dawn a ni.
CMO-in thingpui inpui tum
Vawiin chhun hian CMO Dr.Mal sawma’n Serchhipa thutharlakhawmtute thingpui inpuiah sawmin, District chhunga an Department hnathawh dan tur leh hma chhawpte ti ti pui a tum a ni.
Damdawi In Casualty sawn
Serchhip Civil Hospital casualty chu a bul Trauma Centre kawngpui an-ah sawn a ni a, hei hi mipui tan a remchang hle.

Lawrkhawm

Aizawlah State Credit Seminar buatsaih a ni

Serchhip 3rd Feb. 2010 : National Bank for Agriculture and Rural Developmet (NABARD), Mizoram Regional Office buatsaihin, State Credit Seminar 2010-2011 chu niminkhan Aizawla State Guest House ah neih a ni a. Agriculture Minister Pu H.Liansailova chuan he Seminar hi hmanpuiin State Focus Paper 2010-11 a tlangzarh nghal.
Thu sawiin, Pu Liansailova chuan Mizoram sorkar-in Lo neiha eizawnna leh thingtlang hmasawnna a ngai pawimawh em em a. Kut hnathawktute leh mirethei khaichhuak turin sorkar department te, Bank hrang hrang te leh NGO ten thawh hona tha an neih a pawimawh hle a ni, a ti a. Mizoram sorkar NLUP ruahmanna tarlangin, Pu Liansailova chuan hei hian lo neih leh huan siam lamah te, sangha khawi leh ran vulh hna ah te, pangngang khawi leh kut themthiam hna hrang hrang ah te remchanna tam tak a siam dawn a. A hlawhtlinna turin market tha leh rintlak inthlun zawm pui neih te, a buaipuitu sorkar department hrang hrang ten thahnem ngai taka an enkawl leh bank hrang hrang ten sorkar an puibawm that te a pawimawh, a ti a.
A sawi zelnaah Minister chuan, NER Vision 2020-in hmarchhak bial hmasawnna tura eizawnna hna a ngaih pawimawh deuh deuh, huan siam, pangngang khawi, medicinal plants, sangha khawi etc. te chu Mizoram sorkar-in bawhzui a, tih hlawhtlin a tum tih a sawi bawk.
Seminar kaihruaitu Pu P.C.Sahoo, General Manager, NABARD chuan kum 2010-11 chhunga Mizoram tana Bank sum puktir tur ruahman zat (institutional credit support) chu vaibelchhe 306.68 a ni tih sawiin kum 2009-2010 a sum ruahman aiin 30% a a pun thu a tarlang a. Heta tang hian vaibelchhe 65.26 chu Agriculture leh a kaihhnawih eizawnna hna atan niin Non-farm sector tan vaibelchhe 46.49 leh sector ngaih pawimawh dangte tan vaiblechhe 194.93 ruahman a ni, tih a sawi bawk.
Seminar-ah hian NABARD hotute leh Mizoram chhunga Bank hrang hrang hotute bakah sorkar department pawi mawhte leh pawl hrang hrang te an tel a. Crop loan leh Kisan Credit Card chungchang te, kut hnathawktute tana loan leh tanpuina pek chungchanga harsatna te leh thawhho na tur chungchang te sawiho a ni.
ICDS office hawng
Nimin khan Pu S.Hiato, Minister, PHE chuan Saiha-a Integrated Child Development Services, Project Office a hawng.Minister chuan thu sawiin, ICDS hi nu naupai leh naupangte enkawltu department a nih thu a sawi a, project thar hawn a ni thei ta chu a lawmawm takzet a ni, a ti a. ICDS hian mi chhumchhia leh kuttual leichham te enkawl leh khaichhuah hi a tum ber a ni, tiin heng mite hi mi pangngai a chherchhuah a tum a ni, a ti a, an hnathawh hi Pathian thu nen pawh a in hmeh a ni, a ti bawk.
Waiting shed hawng
MLA LAD Fund atanga sum Rs.90,000/- senga Mizo Hmeichhe Insuihkhawm Pawl, Falkland Branch ten an sak, Waiting Shed, Chite peng ami chu nimin khan Pu R.Lal rinawma MLA, Chairman, Mizoram Law Commission chuan a hawng. Thu sawiin, Pu Rinawma chuan, MHIP ten anmahni tanghma chauh ngaih tuah lova, khawtlang mamawh ngaihtuah a, hma an la chu fakawm a ti a. Sorkar-in ram leh mipuite hmasawnna tura hma a lakna kawngah mahni hma zawn theuh va sorkar tawiawm hi mipuite mawh phurhna a ni, a ti a. Sorkar prog ramme pawimawh NLUP chu a hlawh tlin theih nan fimkhur leh uluk taka kalpui mek a ni tih a sawi bawk.
PO conference
Ram chhunga Legislative assembly bial hrang hranga Preciding officer leh secre tary-te conference vawi 74-na chu nimin khan Madhya Pra desh khawpui Bhopal-ah neih tan a ni.Ni 5 awh tur he conference-ah hian legislative assembly hnathawh dan kal phung bakah thil pawimawh hrang hrang sawiho a ni ang.
Damdawi man sak
Health & Family Welfare Deptt. hnuai Food & drug control adminis tration chuan dan lova hralh khaw chhak damdawi thahnem tak an man. Heng damdawite hi Thailand siam phungzawl damdawi, khuh damdawi, China leh Vietnam siam Malaria damdawi, thin damdawi dip te a ni a. Heng damdawite hi Aizawl Chanmari Venga Pu Lalbiak thanga dawr atanga man a ni.
AIDS dona atan sum ruahman
Asian Development Bank chuan hmarchhak state 5 -Mizoram, Assam, Meghalaya, Manipur leh Nagaland-a HIV/AIDS dona kalpuina turin US dollar maktaduai 1.47 a ruahman a. He sum hmang hian private sector, health service provider-te bakah condom distributor-te tan training chi hrang hrang buatsaih a ni dawn a ni. Asian Development Bank chuan India hmarchhakah te hian HIV/AIDS hi a hluar chak hle tih hria-in, he sum hi a ruahman a ni.

Tualchhung

DC-in NREGS award dawng dawn
District Bawrhsap Pu H.Darzika chu ram puma NREGS kalpui tha, ‘NREGS administration award’ dawng tur mi 25 thlanchhuah zingah a tel a, vawiin hian New Delhi-ah Prime Minister kut atangin a dawng dawn. Serchhipah hian kumin sorkar kum kal mekah NREGS in hlawhna ni 77 neih tawh a ni.
HSLC exam tan dawn
Vawiin atang hian HSLC exam neih tan a ni dawn a, English subject examin, tun thla ni 17 khian an zo ang. HSLC exam dawn hian School hrang hrang ten selection exam hmanga zirlaite an thlit fim thin avangin kumin pawh hian zirlai private candidate an tam hle a ni.
Thlai chi semchhuak dawn
Vawiin hian District Horticulture Department chuan an office-ah thlai chi, chi hrang hrang an semchhuak dawn.

Lawrkhawm

Champhai District Hospital building
sakna tur lungphumphum a ni

Serchhip 2nd Feb. 2010 : Nimin khan Pu Lalrinliana Sailo, Health Minister chuan Champhai District Damdawi In sak thatna tur lung a phum.
Champhai District Hospital tuala lungphumna ah hian Health Minister Pu Lalrinliana Sailo chuan, Mizoram Chief Minister Pu Lal Thanhawla pawhin Champhai Damdawi In sak thatna tur a lung phum tan a ni ta chu lawmpuina thu a sawi a ni tiin, Damdawi In tualah hian pangpar huan te leh fountain te pawh siam tum a ni a ti a, a sakna hmanrua reng reng a chhia hman phal a ni lovang a, damlo te leh thawktu leh mitin tan a ngaihthatna tlak rinawm a ni tur a ni tiin, sak tirh atanga lo vilpui thin turin mipuite a ngen a ni.
Lungphum inkhawm, Dr. Biaksiami, Medical Superintendent kaihhruai ah hian Champhai District Bawrhsap Pu Vijay Kumar Bidhuri, District Superintendent of Police Pu Lalthanmawia leh District Chief Medical Officer Pi K.Ropari te bakah District officer leh party hruaitu engemaw zah an tel a ni.
National Rural Health Mission sum, cheng vaibelchhe 26 vel senga sak tur Champhai District Hospital hi nikum October vel atang khan hmalak tan a ni tawh a, thla 24 chhunga sa zo hman tura ruahman niin, Tantia company ten an thawk dawn a ni.
Health Minister hian Zokhawthar Border Trade hmunhma pawh a tlawh nghal a ni.

Aikal lak tihtawp tum
DP&AR Minister Pu Liansailova chuan Department hrang hrangah aikal mi 400 chuang an awm tih a sawi a. Sorkar hnathawk thununna kawngah aikalte chunga dan lek tur mumal a awm loh avangin aikal ti tawp turin cabinet meeting chuan thu tlukna a siam ta a. Aikal la zingah hian sumdawn duh vangte, hrisel lohna avangte leh ramdang insawn vangte a ni tlangpui tih a sawi bawk.
Zirlaibu sem tan mek
SSA chuan nimin atang khan class-I atanga class-VIII zirlaibu a sem chhuak tan ta a. Federation of Mizoram Govt. School Teachers te phut angin school tinah zirlaibute hi dah a ni mek. Hetihlai hian zirtirtu pawlte chuan ni 3 ral hmaa an dawn kim loh chuan zirlai hi zir loh nise an ti a, hun reilote hnua SSA-in zirlaibu a kima a sem leh mai theih chhan an hriat duh thu an sawi bawk.
Chhawmdawl nan sorkar hna
Sorkar laipui leh MNF inremna avanga lo kir leh te chhawmdawlna atana Mizoram sorkar-in sorkar hna chi hrang hrang 70 siamsak a tum chu peih fel thawkhat a ni tawh a. Mizoram GAD Secretary Pu Lalmalsawma sawi danin, MNF returnee leh an chhungte hnaruak hrang hrang 70 ah thun an nih tur thu hi nikum kum laihawl lamah khan tih chhuah ni tawh mah se, Department tina an luhna tur enfiah ngai chuan hun a duh rei deuh a ni a ti.
CS annual conference hmanpui
Prime Minister chuan tunlai khaw velah mipui ten sorkar lam atanga hlemhletna, inthlahdahna leh that chhiatna ang chi reng reng an ngai thei tawh lo tih sawiin, civil serven t-te chu an hnathawh danah thil ti thar zawng leh rang taka thawk thin turin a ngen. Nimina New Delhi-a Chief Secretary-te annual conference hmasa berah he thu hi sawiin, Prime Minister chuan, sorkar hna hrang hrang thawktu, legislator-te Judiciary leh media-te thlengin rintlak leh thaa thawk tura mawhphurhna a awm a ni a ti a. Sorkar lam atanga mipui beiseina sang chho mek chuan rah chhuah turin an mahni a thawh chak tir thei a ni a ti a. Ei tur lam deh chhuah a pun theih nana state-te hma la tura ngenin, sorkar laipui chuan state-te chu puih a tum a ni a ti bawk.
Kang tuarte chhawmdawlna pe
Lawngtlai Dist. Lunghauka khuaa kangmei tuarte chhawmdawlna tur hmanraw hrang hrangte chu nimin khan Lawngtlai atangin phurh chhuah a ni.
Inrinni kalta khan Lunghauka khua ah hian In 31 chu a chhung bung raw chuh hman lovin a kang fai vek a ni. He kangmei tuarte chhawmdawlna leh tanpuina hi District Bawrhsap-in a pek bakah YLA ten an pe mek bawk.
He kangmei hi naupang-in tih palh thil thua dithlifarfem meichher hmanga a deh kai palh atanga intan a ni.

Agarbati Mizoramin a thawn chhuak mek

Agarbati chhit tur hralhchhuak turin Mizoram sorkar sumdawnna tan a ni ta. Tunah hian a dawr hmasa ber tur hmu tawhin, Chenaia ITC Ltd. SBT Agarbati business chuan Ton 10 supply na tur order an pe fel tawh a ni.
Heng Agarbati supply turte hi Industries Department hnuaia Bamboo Development agency-in a pechhuak dawn a. Order hmasa ber an pek fel hnuah a dang pe leh turin ruahmanna siam nghal a ni.
Hetihlai hian eizawnna inkawhhmuhna lama Industries Department kaltlanga training neih tawh reng rengah training kal tur duh khawp hmuh tur Mizo thalai zingah an awm ngai lo niin Industries Department hotute chuan an sawi a. Agarbati supply tur ton 10 an hmuh mekah pawh thawktu tam an mamawh hle laiin, heti lam hawi thalai an vang hle a ni an ti.
NIFT-a training turte leh thil dang zir tur an Department kaltlanga awm thinte chu thalai ten chhawr tangkai tum thin se an duh thu sawiin, Mizoram sorkar-in District tinah Lo neia buh thar chhuak tam tura tan a lakna ti hlawhtling tur leh ei leh bara intodelh tura eizawnna dang zawng tura nasa taka tan lak a pawimawh tih an sawi bawk.

MJA Serchhip District Annual Conference vawi 3-na neih a ni

Zirtawpni, ni 29 khan P&E Rest House Serchhip Bukpuiah neih a ni.
Mizoram Journalists’ Association Serchhip District chuan annual conference vawi 3-na an hmanah hian khuallianah Pu Jim K.Chozah Director, I&PR Deptt. chu hman a ni.
Khuallian chuan thu sawiin, thutharthehdarhtu kalkhawmte chu mipui tana rawngbawltu an nih leh an pawimawhna hre thar theuh turin a chah a. Sorkar pawhin Journalist-te chu a ngai pawimawhin hamthatna an dawn theihah pawh nasa zawka tanpui zel a tum a. Welfare fund pawh tuna kalpui mek dan chu siamthain, huamzau zawka kalpui theih turin a dante siamthain niminpiah khan order a ti chhuak leh tawh a ni a ti. Natural calamity-khuannu chhiat tawhna MJA member-te chunga a thlen thulha tanpuina ngaihtuah a ni ang a,hna an thawhnaa chetsual an tawhin a case azira tanpui an nih dawn bakah natna khirhkhan tuar an awmin MJA welfare fund atangin tanpuina pek an ni dawn a ni a ti.
A sawi zelnaah Pi Jim K.Chozah chuan remna siam hi Journalist te chuan hnaa nei tel zel tura chahin, chu chuan kan ram leh hnam tan rah tha a chhuah ngei ka beisei a ni a ti bawk.
He hun Pu C.Lalhminghlua Vice President MJA Serchhip Dist. kaihhruaiah hian khualzahawm Pu C.Lalzamlova Treasurer MJA Gen.Hqrs. pawhin thu sawiin, Press mite hian kan pawimawhna kan hre thar zel tur a ni a.Ram leh hnam thlir chunga kan thu chhuah turah kan society tan a him em tih ngaihtuah chungin thu i chhuah thin ang u a ti.
He hunah hian Tobacco awareness campaign neih nghal a ni a, rescource person Pi Lal Riliani, President Indian Socety on Tobacco & Health Mizoram Chapter chuan, Vaihlo hi nunna suattu hlauhawm a ni tih thupui hmangin zirtirna a pe a. Vaihlo, zuk leh hmuamin mihring a tih chhiat dan chipchiar taka tarlangin, vaiho leh a kaihhnawih chu mihring ti chhetu a nih piah lamah sum khawhralna lian tak a ni a ti a. Mizorama Cancer vei kan tamna bul ber pawh zuk leh hmuam kan uar vang a ni a ti bawk.
India ram bikah pawh a hun lova mi nunna la tu tam ber pakhat, mahse tum chuan pumpelh theih chu mei zuk leh sahdah lam chi hmuam hi a ni. Heng thil chin tha lo avang hian kumtin hunlohvah India mi nuai 10 an thi ziah thin a ni a ti a. Hemi avang hian sum leh pai, hriselna eizo tu zuk leh hmuam i sim ang u, tiin kalkhawmte a sawm nghal a ni.
An President Pu Lalremruata Ralte pawhin thu sawiin, Journalist te hi sum leh therlo engemaw hmanga thlem mai theih leh kan zahawmna tlakhniam pawh khawpa duhamna rilru pu kan nih loh a ngaiin, Journalist dik tak kan nih ngam a pawimawh a. Sorkar leh mimalte an dik lohna hailang ngamtu leh a tha lo lai siamtha tura sawisel ngamtu leh fak tlak fak hreh lotu kan ni tur a ni a ti.
He hunah hian Gen.Secretary Pu C.Ramengmawia leh Treasurer Nl H.Lalbiakzauvi ten report an pe a.Pu Lalmuanawma Hnamte-in lawmthu sawiin, chawhma hun a ti tawp a ni.
Chawhnu lamah rorel inkhawm leh hruaitu thlanna neih a ni a. An President Pu Lalremruata Ralte kaihhruaina hnuaiah Agenda 9 ngaihtuahin, an thu pass langsar zual zingah -
‘ Serchhip khawpui chhung kawngpui chhe lutuk hi a rang thei anga siamthat a nih theih nan sorkar-in hma la se an tih bakah Mizorama tui khawhthla sang ber ‘Vantawng khawhthla’ panna kawng hi a theih anga rangin sorkar-in siamtha rawh se, tih te I&PR Deptt. kaltlanga Advertisement an pekchhuah zaa sawmnga tal hi District hrang hrangah rualkhai taka sem a nih theih nan hmalak ni rawh se tih te bakah Serchhipa District I&PR Office building sorkar-in min sak sak hi lawmawm kan ti a, thawktu famkim nen office thar hi hawn thuai ni rawh se tih te a tel.
Kum 2010-2012 chhunga MJA Serchhip District hruaitu atan hengmite hi thlan an ni
President : Lalremruata Ralte
Vice : C.Lalhminghlua
Treasurer : H.Lalbiakzauvi
Executive member atan : PC.Vanlalhruaia, C.Ramengmawia, Zonunsanga Kawlni, Lalmuanawma Hnamte, Thuamliana leh Kapliana Pachuau te
Elected OB te hian Executive member atang hian an thawhpui tur Secretary-te an ruat leh dawn a ni.

He Conference hi MJA Gen.Hqrs. hruaitute pawhin an rawn hmanpui a. Gen.Secretary report atanga a lan danin MJA Serchhip Dist. ah hian Firm hrang hrang 11 awmin, member 17 an awm mek a ni.

Tualchhung

Ralkhelna tur awm lo ti
Tunhnaia Thenzawla nausen thla 2 tling lo pasarih lai an boral thu ah Hospital Directorate chuan ni 25 khan Paediatri cian an rawn tir a. Doctor-te chuan he natna hi ‘Kaih’ Mizoram hmun dang pawha awm, inkaichhawn theih a ni lova, mipui tan ralkhelna tur a awm lo an ti.
Nursing Supt. ah kaisang
Pi Lalrinthangi Pachuau, Asst. Nursing Superintendent Serchhip Hospital chu Nursing Superintendent-ah a kaisang a, a thawhna hmun pangngai Serchhipah a thawk chhunzawm dawn a ni.
Hri ven beihpui thlak
AH & Vety Department Serchhip chuan ni 19 January atangin ran ke na hri ven beihpui an thlak mek a. Foot & mouth Disease kai thar ran an awm loh thu Dr.C.Khawlthangmawia VAS chuan sawiin, bawngsa ei hlauhawmna a awm tawh lo a ni a ti. Ran hri ven beihpui thlakna kal mekah hian Vety-a thawktu ten ran awmna hmunah kalin, an chiu sak thin a ni.

Tualchhung

Maxi Cab chuan man san
Serchhip District Maxi Cab Owners Association chuan thla thar February ni 1 atanga hman tan turin Serchhip – Aizawl Maxi cab chuan man chu Rs.150 a ni tawh dawn an ti.
NREGS inhlawhna kalpui mek
Tunlai hian VC hrang hrangte kaih hruaina hnuaiah NREGS inhlawhna kalpui leh mek a ni a. Tun dinhmunah Serchhip-ah ni 77 inhlawhna hmuh tawh a ni a, kumin March thla ral hma hian ni 100 chu inhlawhna an hmuh ngei tur thu District Bawrhsap chuan a sawi.
Tui sem chungchangah inkawm
Tunlai hian PHE tui sem chu damdawi rim a nam tia sawi leh sel a awm avangin nimin khan MJA hruaitu thenkhat ten PHE EE leh Senior Chemist PHE te a office-ah kawmin, thil awmzia an zawt fiah a. PHE hotute chuan tui tih thianghlimna atan hian chi hman a ni a, hei hi hriselna atan a hlauhawm lova, a tha zawk a ni an ti.