Dodalna karah hmeichhiate tana seat 33% hauhsakna bill House-ah pharh a ni
Parliament leh State Assembly-a hmeichhiate tana seat 33% hauhsakna tur ram danpui siamthatna tur bill chu nimin khan au bengchheng karah Rajya Sabha-ah putluh a ni.
He bill dodaltu RJD leh Samajwadi member-te chu house laiah chhuak khawmin, nasa takin an aurual a, Chairman Mohammed Ansari-a aurinna mike an chhuhsak bakah a dawhkana bill copy chu pawtthlerin, a dawhkan suasam an tum bawk a. Hei vang hian inkhawm chu nizan dar 6 thleng tihtawp lailawk a ni.
Lok Sabha inkhawm pawh hemi chungchang vang bawka tum 2 tih tawp lailawk a nih hnuah nileng atan tihtawp a ni.Party lian zawng zawng deuh thaw chuan hmeichhiate tana seat hauhsakna tur bill hi an thlawp a, rorel lai Congress leh eptu pawl lian ber BJP pawhin he bill hi an thlawp a ni.
Hetih lai hian RJD leh Samajwadi Party chuan he bill duhloh entir nan pawn lam atanga Congress kaihhruai UPA sorkar an thlawpna an hnukdawk nghal bawk. Heng Party 2 te hian he bill an dodal nachhan bul ber chu ST/SC leh Hnam hnufual dang hmeichhiate tana seat 20% hauh lehchhawn an duh vang a ni.

Lawrkhawm

PAMRA-in memorandum thehlut
Peace Accord Mizoram Returnee Association (PAMRA) chuan Inrinna lehlanga Aizawl rawn tlawhtu, Pi Sonia Gandhi hnenah memoran dum thehlutin, MNF-in peace accord kum 1986 a aziak atanga tun thlenga Mizoram muanna thliarkar a nih kum 25-na lawm tura inbuatsaih mek a nih thu leh he ni lawmna senso tum sak turin sorkar laipui an ngen a. Hemi rual hian Mizoram sorkar-in sorkar laipuia leiba a neihte pawh thaibo sak turin an ngen a. Hei bakah hian ram buai laia thi mi 424 chhungte hnenah Mizoram sorkar in Rs. nuai 1, sorkar laipuiin Rs. nuai 9 theuh pe turin an ngen bawk.

New Secretariat tiin thlak
Aizawla Secretariat leh sorkar building dang te awmna New Capital Complex tia hriat chu New Secre tariat Complex tiin a hming a thlak a ni a. Hemi chungchanga hriat tirna hi Mizoram Governor chuan tunhnai khan a ti chhuak a ni.

Kum 2012 KTP inkhawmpui Thenzawlah

Inrinnia rorel inkhawmah nakum 2011 KTP rorel inkhawm Aizawl Bethlehem Kohhrana nghah leh kum 2012 Gen.Conference chu Thenzawla nghah an rel a. Hei baka an thil rel langsar zual zingah thu leh hlaa Mizotawng hman dik kawnga hmasawn nan KTP-in hma la se tih te, Krismas leh Kumthar vuakvet thianghlim zawka thalai ten an hman dan tur inzirtirna Mizoram pum huapin Central KTP-in buatsaih se tihte a tel a.
Kum 2011 KTP kumpuan atan ‘Thu awihna’ tih an thlang a. Kum 2010-2011 Central KTP budget atan Rs. nuai 13,81,500 an pawm bawk.

Pi Sonia Gandhi-i’n Rajiv Gandhi Sports Stadium lung phum a phum

Serchhip 8th March 2010 : Prime Minister hlui, Rajiv Gandhi hming chawia sak tan mek, Aizawl Mualpuia Rajiv Gandhi Sports Stadium Lungphum chu Inrinni khan UPA Chairperson Sonia Gandhi chuan a phum ta.
Pi Sonia Gandhi chuan, Mizote chu boxing ah te, martial arts ah te leh thal kah ah te talent nei tha tak in ni tiin, infiamna chi dang dangah pawh Rajiv Gandhi Stadium hian an talent neihte cho chhuaktu anih ngei a beisei thu a sawi a. Rajiv Gandhi kha thalaite hmakhua veitu anih zia sawiin, Mizote pawh ngaipawimawhin, in mamawhte pawh a hre hle a ni a ti a.
He infiamna tual hian Mizoram leh India tan ropuina thar a paw chhuak ngei ang tih a beisei tlat thu sawiin, Pi Sonia Gandhi chuan, UPA sorkarin state ah leh central-ah te a thil tum a tarlante chu tih puitlin vek a tum a, NLUP pawh tih puitlin ngei a tum a ni a ti a. Mizo ram a Medical leh Profes sional Institute din tur thuah pawh ka thlawp tlat a ni a ti. Mizoram hmasawnna hi India ram hmasawnna a ni a ti.
Chief Minister Pu Lal Thanhawla pawhin thu sawiin, kum 1986 a Rajiv Gandhite chhungkua an lokal tuma Mizo thalai ten ‘world class infiammi kan neih theihna turin world class stadium min pe rawh’ tia au hla an neih kha Sonia Gandhi in ala hriat reng a rin thu a sawi a. Chuvangin he project hi Rajiv Gandhi chhanna leh kan thalaite awh em em rawn tipuitlingtu tur anih ngei a beisei thu a sawi a.
Pu Lal Thanhawla chuan a sorkar programme lian ber NLUP chu inpawh leh hmasawnna rualkhai taka kalpui te, miretheite chhanchhuahna tur anih bakah ramngaw humhalha boruak tha siamtu anih theih dawn bawk avanga central sorkar pawhin tha an tih pui thu a sawilang a. Hetah hian Pi Sonia Gandhi thlawpna kan mamawh reng dawn a ni a ti a. Chief Minister chuan kutdawh puan sin reng kan duh tawh bik loh thu sawiin, mahni intodelh hi kan thlakhlelh tawhzia leh chumi atana harsatna sutkian tur la awmte kan sutkian theih nan, nakina tanpuitu kan hin zawk theih nan tunah hian min tanpui rawh u kan ti a ni a ti bawk.

Lawrkhawm

Ram chhung hmun dang rualin Mizoramah a vawikhatna atan National Safety Day hman a ni

Serchhip 5th March 2010 : Nimin khan India ram hmun dang rualin Mizoramah National Safety Day hman a ni.
March ni 4 hi India ram pumah National Safety Day atan hman thin a nih angin Mizoram-ah pawh nimin khan he hun hi Labour Employment & Industrial Training Minister Pu Lalrinliana Sailo hovin ama office-ah hman a ni.
Minister Pu Lalrinliana Sailo chuan, he Ni hian a tum ber chu Company, Factory leh Industry hrang hranga hnathawktute hriselna leh himna a ni a, Mizoram-ah Industry lian leh Construction Company lian tham te awm lo mah sela hnathawktute himna leh hriselna lamah hian sorkar-in theihtawpin hma a la zel dawn a ni a ti a. India sorkar-in kut hnathawktute hi ram hnuk an ni tih hriain a ngai pawimawh tak zet a, hriselna tha leh hnathawhna hmun him an neih theihna turin hma nasa takin a la reng a ni a ti bawk.
National Safety Day hmanna-ah hian Trade Union hrang hrang aiawh leh official-te an tel a, hun kal zel turah changtlung zawka he Ni hman a nih theih nan Resolution pahnih passed a, chung chu – Kum tina National Safety day hman ziah leh Mizoram Industries neitute, Company te leh hnathawktute zingah awareness campaign a remchang anga neih te an ni.
He Ni ‘National Safety Day’ hi National Safety Council din cham zulzuiin kum 1972 atang khan kumtin hman thin a ni a, Mizoramah chuan a vawi khatna a ni.

Kamalanagar-ah lungawilohna kawng zawh
Bangladesh ram chhung Chhitagong hill tribal-te chunga tunhnaia hleilenna thleng an dem zia lantirin nimin zing khan Kamalanagar-a Chakma tlawmngai pawl hrang hrang leh political party ten kawng an zawh.
Kawng zawhtute hian an unaute chunga hleilenna thleng an dem zia lantirna thuziak chi hrang hrang kengin, an au rual bawk a. Kawng zawh a nih lai hian he khuaa dawr zawng zawngte pawh an inkhar vek a ni. Kawng zawhtute hian Prime Minister hnenah memorandum thehlutin, Chhitagong hill track-a tribal chengte himna tura hmala nghal tur leh a tul anga Bangladesh sorkar pawh dawr thuai turin an ngen a ni.
Asian for Human Right report-in a tarlan danin tribal-te chunga hleilenna hi tunhnai February thla tawp lama thleng a ni a. Chakma, Mizo, Garo leh hnam dangte chenna In 200 atanga 300 vel zet hal a ni a. Heng zingah hian dawr 7, Biak In leh Bhudist temple bakah United National Development Programme enkawl Zuma khaw 3 te pawh a tel a. Bangladesh sipaite chuan mi 6 kaphlumin, midang 25 an hliam bawk a. Mi dang thahnem tak an awmna chin hriat lovin an awm mek bawk nia sawi a ni.

Mizoram aiawha zinte lo haw
Bangladesh-North East India Trade & Investment Conclave leh Joint India-Bangladesh Trade Show February ni 25, 2010 Dhaka khaw puia Mizoram aiawha zuk kal te chu tluang takin March ni 2 khan Aizawl an lo thleng leh tawh a. Hemi tuma sawm an nih anga zuk kal te hi Trade & Commerce Minister Pu Lalrinliana Sailo, Parliamentary Secretary Pu S.Laldingliana, Trade & Commerce Secretary Pi Esther Lalruatkimi leh Trade & Commerce Director Dr.C.Lalzirliana te an ni.

Sesawng H.S lung phum
Rashtriya Madhyamik Shiksha Abhiyan (RMSA) hnuaia cheng nuai 52.12 senna tur Sesawng High School Building lungphum chu Nilaini khan Parliamentary Secre tary Pu Chawngtinthanga’n a phum a. Thu sawiin, Pu Chawngtinthanga chuan, ramin hma a sawn dawnin Education in hma a hruai a, ram a tluk chhiat dawn pawhin Education bawk chu a hmahruaitu a ni fo thin a ti.

Red ribbon road show Saiha-ah
Mizoram State AIDS control society leh Life for comprehensive development tangkawpin Saiha ah nimin khan Red ribbon road show an buatsaih a. Hetah hian zai thiam hrang hrangte an zai a ni. He road show-in a tum ber chu Mizo mipui te AIDS laka an fihlim theihna tura inhrilh hriatna leh inzirtirna a ni a. District khawpui hrang hrangah road show hi neih chhunzawm a ni ang.

Wheat chhek khawl ngah
Union Agriculture Minister Pu Sharat Pawar chuan kumin leh nakum thleng daih tur ei tur wheat lam chi chu sorkar-in a chhekkhawl tawh tih a sawi. He thu hi Mela a hawnna sawiin, Pu Pawar chuan sorkar-in wheat tam tawk tak a chhekkhawl tih a sawi a. Kum 2009-2010 chhung hian wheat thahnem tak thar a ni dawn tih sawiin, kumin chhunga wheat thar chhuah hian wheat tharchhuah lamah record thar siam beisei a ni a ti.

Tuialhthei man sang dodal
Parliament Budget session neih mekah BJP chuan sorkar-in tuialh thei man a tih san chu an dodal tlat thu an puang a. Hei hi party dang dangte pawhin an thlawp tlat tih a sawi a. Hetih lai hian March ni 8 a Rajya Sabha-a pharh tur hmei chhiate hamthatna dan ‘women reservation bill’ chu an thlawp thung hle tih a sawi bawk.

Kum 5 chhunga Mizoram sum hman tur ruahman

Ni 5.2.2010: Finance commission 13-na chuan kum 5 kal leh tura Mizoram sum hman turin Rs.vaibelchhe 8805 leh nuai 30 a ruahman.
13th Finance commission report thla hlui ni 25-a Parliament-a pharh takah chuan Mizoramin kum 5 chhunga hmasawnna hna hrang hrang a thawhna turin Rs.vaibelchhe 8805 nuai 30 ruahman a nih thu hi tarlan a ni a. Tualchhung inrelbawlna local bodies hrang hrang atan Rs.vaibelchhe 310 nuai 70, chhiat tawhna hrang hrang atan Rs.vaibelchhe 47 leh nuai 50 leh naupang zirna elementary education atan Rs.vaibelchhe 5 ruahman a ni.
Heng bakah hian Judi ciary thenhran tak tih chang tlunna atan Rs.vaibelchhe 13, voter ID thlakna tur buaipuina atan Rs.vaibelchhe 1 leh nuai 20, District innovative fund Rs.vai belchhe 8 ruahman a ni bawk.

Sorkar kumtharah NLUP sem a ni ang
– Chief Minister
Chief Minister Pu Lal Thanhawla chuan sorkar kumtharah NLUP sem a ni ang a ti.
He thu hi a thubuai chungchanga thiam a chan lawmna; nimina Aizawla an party office Congress Bhawan-a neihah sawiin, Chief Minister chuan, MNF lam an hmanhmawh tawh bawka sorkar kumtharah chuan NLUP chu sem a ni ang a ti a. Sorkar laipuiin NLUP chu a phur pui tih sawiin, Mizoram chu sorkar laipuiin a enchhin nan a hmang dawn a, a hlawhchham a nih chuan sorkar emaw ram emaw chauh a hming chhe dawn lova, Mizoram chu Kristian ram tia hriat a nih avangin Kristianna hmai pawh a bal thei a, chuvangin a hlawhchham thianglo a ni a ti.
Pu Lal Thanhawla chuan an pawl chu lawmna leh nuam tinrengin a umzui reng nia sawiin, opposition party an nih lai pawhin lawmna chi hrang hrangin a chenchilh reng a. Lawmna nuam tawl chu Pathianin a phal a, mahse amah theihnghilh erawh a phal lo a ni a ti a.
MNF chuan ngam leh ngam lovin zalenna an sual tih Zofate a hriattir duh tih Pu Hawla chuan a sawi a. Kum 20 taltawp Mizoram chu tah leh ha thialna rama an siam hnuah Pathianin rem a ti lo a ni a ti a. MNF a tihte chu martarte ni lovin, an hotute an nih thu a sawi bawk.
He huna thusawitu dang Home Minister Pu R.Lalzirliana chuan Congress sorkar hunlai ngeia Judiciary dah hran chuan Chief Minister chuan a thubuai kal zel dan turah hlauhthawnna a neih loh zia a ti lang a ni a ti a. MNF sorkar lai khan Mizoramah hel an ngampa tih sawiin, tun sorkar-ah hian thleng ve lo se an duh tih a sawi bawk.

Ni 3 chhung awh tur District level Exhibtion Chief Minister-in a hawng

Serchhip 25th Feb. 2010 : Ni thum chhung awh tur, District Level Agriculture & Allied Sector Exhibition chu Serchhip Field-II ah nimin khan Chief Minister Pu Lal Thanhawla’n a hawng.
Chief Minister chuan, Agriculture leh a kaihhnawih department hi ram thang zelah a pawimawh tawlh tawlh dawn a. Chuvangin kut hnathawh hi hna zahawm ber a ni tih kan hre thar zel dawn a ni a ti a. Exhibition neih hi thil siam chhuah leh tharchhuah te mipui hmuh atana pholan ringawt a ni lova, heng thil pholan atangte hian engtin nge tangkaina kan hmuh theih ang tih lam hawi zawnga buatsaih a nih thin thu Pu Hawla chuan a sawi a. Tun hmaa mi tih tawh kan lo chin chhawn thin thu leh mi min tih hmuh thin avanga ti ve kan nih thin kha kalsana mahni irawm chhuak ngei atanga hma kan lak a tul tawh a ni a ti a. Organic Framing te, changpat hmanga leitha siamte sorkar chuan uar chhoh deuh deuh a tum dawn tih a sawilang a, hetiang exhibition hi district dangah pawh chhunzawm zela mi thatchhe deuh te fuihharhtu tangkai tak a nih zel a beisei thu a sawi bawk.
Chief Minister chuan, sorkar hnathawkte dinhmun tarlangin, sorkar hnathawkte chu sorkar chhiahhlawh an ni a, chutiangin politician-te pawh mipui chhiahhlawh an ni a. Sorkar hnathawktu hrang hrangte hian an nihna dik tak hi hria sela chuan an hna ah thahnem an ngai ang a, tun ai pawh hian biang biak an nuam zawk ngei ang a ti a. Mizo Kristian zingah mahni hnathawhna hmuna Kristianna hmel hmuh tur kan awm lo thin chu pawi a tih thu a sawi a. NLUP chungchangah a dawng tur ten ar leh vawk vulh thlang an tam thu sawilangin, uluk taka sorkar-in kalpui a tum avangin tuna pawisa ruahman sa pawh hi la khawih chet loh an rel thu a sawi a. Ar emaw vawk emaw vulh thlangtuten an tuchhuan thlenga eizawnnan an hman theih nan 20/30 chauh vulh lovin farm lian tak din a tul zawk tur thu a sawi lang bawk.
He exhibition Agriculture Technology Management Agency (ATMA) buatsaihah hian item entir tura tih 87 awmin a bak thil dangte nen a vaiin item 2149 entir a ni a. Item 98 ah lawmman 1-na atanga 3-na siam a ni a. Agri. leh a kaihhnawih department dangte bakah DRDA, Assam Rifles, MIFCO, Thenzawl Handloon & Handicrafts Association leh Flower Show entir a ni a. Heng bakah hian Aizawl atangin Hnamchhantu, LRZ leh RTF Enterprise ten an thil zawrh laite an pholang bawk.
Exhibition hawnna inkhawm hi Dist. Bawrhsap Pu H. Darzika’n a kaihruai a, Chief Minister hi a nupui Pi Lal Riliani bakah Pu K.S. Thanga, Parliamentary Secretary leh Pu K. Lianzuala, Chairman, KVIC Board ten an tawiawm a ni.

Lawrkhawm

North East Expo 2010 Aizawlah
Chief Minister-in a hawng

Serchhip 24th Feb. 2010 : Ni 5 chhung ni 23 – 27 Feb 2010 thleng awh tur, North East Expo : Mizoram chu nimin khan Chief Minister Pu Lal Thanhawla chuan Milleneum Centre Roof Top ah a hawng.
Chief Minister chuan midang ten Industry lama min hmelhriat ve theihna tura hetiang Expo buatsaih a ni chu a buatsaihtute chungah leh a tel ve te chungah lawmthu a sawi a. Mizoramin Forest leh Agriculture lama sum chang thei hausakna namemlo kan neihte haichhuah tur a awm thu sawiin, handloom leh handicrafts lamah pawh kan la inpholan tam tawk loh avangin hriat kan la hlawh tawk lo mai a ni a.Chuvangin hetiang neih theihna hun Confederation of Indian Industries in hma a rawn la hi a lawmawm tak zet a ni a ti a. Mizoram chu sawiloh, inkalpawhna a that tawk loh avangin India hmarchhak pum hi India ram nawlpuiin min hre lo hle a ni tiin, tunah chuan central sorkarin hmasawnna kalchhohpui danah kawng thar duangin, chumi chuan India ram khawilai pawh inhnamhnawih vekin rualkhai takin hmasawnna kan neih tlan theih a beiseiawm a ni a ti a. Ramri a insumdawntawnna Myanmar nen mumal zawka kan neih theih nan Union Minister for Commerce pawhin Zokhawthara Land Custom Stations chu hawn a inpeih reng a ni a ti a.
A sawi zelnaah Pu Hawla chuan, Kaladan Multi Modal Transport Project pawh India leh Myanmar lawngchawlhna te hmanga, chuta tanga Mizoram kaltlang India hmarchhak hmun hrang hranga bungrua te phurh theih anih hunah Mizoramin nasa takin hlawkna kan hmu thei dawn a ni a ti a. Hemi a Motor kawngpuilian Myanmar leh Mizoram chhung inkalpawhna siam tur atan pawh central sorkar-in cheng vaibelchhe 660 remti tawhin, a lungphum pawh Union Minister for Surface Transport & Highway Pu Kamal Nath pawhin rawn phum a tum thu Chief Minister hian a sawi bawk a ni.
North East Expo : Mizoram hi Confederation of Indian Industry (CII), DONER leh Mizoram sorkar Department of Industries tangkawpin a buatsaih a ni a. CII a Department of Initiative Pi Indrani Kar-in a kaihruai a ni.

Social Welfare Minister hovin hmalak dan leh hmachhawpte thlirho
Nimin khan Minister Pu P.C. Lalthanliana’n a office chamber-ah a department chan Social Welfare Department-a Directorate Officer Class A chin leh Secretariat top official-te meeting pawimawh a neihpui a, kumin chhunga hmalak dan tur leh nikum chhunga an hnathawh dante thlir hona an nei.
Minister chuan thu sawiin, Social Welfare Department hi state sorkar a department pawimawh central atang pawha Ministry 7 laiin an enkawl rawn leh Nodal a an hman an nih thu sawiin, thawktute inthlahdah ngai thei lo a, hun leh hmun dik tak leh a nih dan tur ang taka thawh ngai a nih bik thu a sawi a ni.
He meeting-a an rel pawimawh zualte chu: Women & Child Development, Social Welfare atanga indan tir chungchang; Rualbanlo (Persons with Disabilities) te tana Commissioner hran neia office din; Integrated Child Development Scheme (ICDS) Services kalphung zirchian leh sawi ho; Forest Dwellers Act kalpui zui dan tur rel; Mizoram Social Defence & Rehabilitation Board hnathawh dan leh an kalphung thlirho leh Integrated Child Protection Scheme chung chang sawiho te an ni.

Minister Bangladesh-ah
Minister Pu Lalrinliana Sailo chu vawiin hian Dhaka-a Bangladesh NE India Trade & Investment Con clave, Hotel Sheraton Complex-a neih tur hmangin akal dawn a. Pu Rina hian ‘ Emerging Business Opportunities in Mizoram’ tih he conclave-ah hian a sawi dawn a, Foreign Minister of Bangladesh, Dr. Dipu Moni nen inkawmin, Land Customs Station Theghmukh leh Demagiri (Tlabung) nena sum dawnna tih hmasawnna kawng a sawipui ang a.Bangladesh a a cham chhungin Prime Minister Pi Sheik Hassina; Commerce Minister Pu Faruk Khan kawmin, sumdawnna hmun pawimawh a fang bawk dawn a ni.

Secretary pension tur thlah
Tun hnaia pension-a chhuak tur Secretary, I&PR Pu Nghaklian mawia chu nimin chhun khan I&PR Department Officers leh MJA Office Bearers-ten thlahna hun hmangin Director, I&PR Office-ah hun tawite an hmang.

Mizoram Grand hockey
Mizoram Hockey Association in a buatsaih, Mizoram-a Grand Mizoram Hockey Championship hmasa ber, Ramhlun Sports Complex-a neih chu niminkhan Chief Minister Pu Lal Thanhawla chuan a hawng.He Cham pionship-ah hian Mizoram hmun hran hran atangin team 16 an lut a ni.

PIC Khawzawlah
Bharat Nirman Public Infor mation Campaign thawh 10-na chu nimin khan Khawzawl Zaingen Community Hall-ah neih a ni a. Campaign ah hian Central Sorkar Schemes leh Programme chi hrang hrang kalphung leh hnathawh dante chu Mizoram-a kalpuitu Department mithiam ten mipui pung khawmte an hrilhfiah a ni.He hun hi Minister Pu Lalrinliana’n a hmanpui a ni.

Zirlaite chawimawina hlan
Regional Institute of Paramedical & Nursing Sciences (RIPANS) atanga B.Sc.(Nursing), B.Sc.(MLT), B.Pharm. leh Diploma in RICIT leh Diploma in OT zirlai hlawhtlingte tan nimin khan Vanapa Hall-ah ‘Gra duation & Lamp Lighting Ceremo ny’ neih a ni a, he hunah hian Mizoram Governor Lt.Gen(Rtd) M.M.La khera chu Khuallian niin, zirlai passed chhuakte hnenah Certificate leh lawmman hlanin, an hlawhtlinnaah lawmpuina leh an hmalam hun zel atan a duhsakna a hlan a ni.

Lawrkhawm

MURA-te kut an inthlak
Mizoram Underground returnee Association (MURA) pawl chhunga intih thiamlohna avangin nimin khan MURA pawl pakhat zawk ten MURA pawl lehlam nia sawi zing amite kawng kal lai kut an thlak avangin mi 3 man an ni.
Heng mi mante hi MURA executive member – Biakngheta Aizawl ITI Veng, Vice President Lalngura Aizawl Tuikual North leh executive member Hratliana Aizawl Bethlehem Vengte an ni a, Police ten an kawl mek a ni.
Police-te sawi danin MURA pawl leh lam mi 3 Aizawl Zodin Sq. a an kal lai chu lehlam pawl zawk ami te hian lo ti dingin kut an thlak rawn a, kut tuarte hi Aizawl mi vek niin Lallungmuana Thuampui Veng, Hrangchungnunga Khatla leh Liandova Tuikual te an ni a. Lallungmuana hi a lu ah thisen chhuak khawpa hliam niin, midang 2 te erawh an na lutuk lo a ni. He thil thleng chungchangah hian nimin khan Aizawl Police station ah FIR thehluh a ni a, Police-te chuan MURA kutthlaktu pawl zawkte chu kokhawmin, an zinga kut lo thlak nasa zualtu mi 3 te hi an man ta a ni.

6th pay zir chiang dawn
Mizoram sorkar hnathawkte hlawhbi siamfel tura ruat Fitment committee rawtna zirchiang tura din committee member Minister – Pu H.Liansailova, Pu Lalsawta, Pu Zodintluanga leh Parliamentary Secretary Pu Lalthanzara te chuan central leh state dang ten 6th pay an kalpui dan zirchiang turin New Delhi an pan a, kar khat chhung a tul dan angin sorkar laipui hotute kawmin, rawtna te an sawipui dawn a ni.

Bilkhawthlir-ah kawng zawh
Bilkhawthlir Joint NGO chuan mipui, Mizote him tlanzawkna tur nia sawiin,sorkar chu Mizoram leh Assam ramri ti chiang turin an phut. An khaw nu Zorammuani thih dan chungchang an lungawiloh lantirna kawng zawh nimina an neihah resolution siamin, tualthat tu chu Feb. thla chhung ngeia man an phut a, engemaw thil thlen tuma Mizoram Police-te aia Assam police-te an che rang thin zawk chu pawi an tih thu an sawi bawk.

Parliament-ah thu sawi
Sorkar laipui chuan a firfiakte chona lam chi zawng zawngah thil thli thlai rengin, venhimna hmanrua ti tha a, ti chak turin hmalakna eng emaw zat a siam tih a sawi. Parlia ment budget session tan ni, nimina House 2 thukhawm te hmaah thu sawiin, President Pi Patil chuan a firfiaka chetna leh a kaihhnawih thil hi sorkar laipui chuan a ngai thei ngai dawn lo a ni a ti bawk. Parliament session hi March ni 16-April ni 12 thleng chawlh lailawk a ni ang a, May ni 7 ah zo tura ruahman a ni.

Sikh thahna dem
Pakistan-a Taliban hovin Sikh mi 2 rawng taka an that chuan dem a hlawh hle a. He tualthatna hi External affairs Minister Pu Krishna chuan tun kar Ningania Pakistan leh India palaite inbiakna neih turah hemi chungchang hi sawi lan tel a ni dawn tih thuthar lakhawm tute a hrilh.

Zirlai inhalhlum leh
Andra Pradesh-a Telingana state hran din ngiatna kal zelah zirlai pakhat a inhalhlum leh tak avangin Telingana bial dung leh vangah lungawiloh lantirna a tam hle a. Hmun tam takah mipui aiawha thlan Minister leh MLA-te chu mipuiin bawhbuaiin, an nihna atanga ban turin an nawr mek a, boruak a tang chho mek zel a ni.