Sorkar kumtharah NLUP sem a ni ang
– Chief Minister
Chief Minister Pu Lal Thanhawla chuan sorkar kumtharah NLUP sem a ni ang a ti.
He thu hi a thubuai chungchanga thiam a chan lawmna; nimina Aizawla an party office Congress Bhawan-a neihah sawiin, Chief Minister chuan, MNF lam an hmanhmawh tawh bawka sorkar kumtharah chuan NLUP chu sem a ni ang a ti a. Sorkar laipuiin NLUP chu a phur pui tih sawiin, Mizoram chu sorkar laipuiin a enchhin nan a hmang dawn a, a hlawhchham a nih chuan sorkar emaw ram emaw chauh a hming chhe dawn lova, Mizoram chu Kristian ram tia hriat a nih avangin Kristianna hmai pawh a bal thei a, chuvangin a hlawhchham thianglo a ni a ti.
Pu Lal Thanhawla chuan an pawl chu lawmna leh nuam tinrengin a umzui reng nia sawiin, opposition party an nih lai pawhin lawmna chi hrang hrangin a chenchilh reng a. Lawmna nuam tawl chu Pathianin a phal a, mahse amah theihnghilh erawh a phal lo a ni a ti a.
MNF chuan ngam leh ngam lovin zalenna an sual tih Zofate a hriattir duh tih Pu Hawla chuan a sawi a. Kum 20 taltawp Mizoram chu tah leh ha thialna rama an siam hnuah Pathianin rem a ti lo a ni a ti a. MNF a tihte chu martarte ni lovin, an hotute an nih thu a sawi bawk.
He huna thusawitu dang Home Minister Pu R.Lalzirliana chuan Congress sorkar hunlai ngeia Judiciary dah hran chuan Chief Minister chuan a thubuai kal zel dan turah hlauhthawnna a neih loh zia a ti lang a ni a ti a. MNF sorkar lai khan Mizoramah hel an ngampa tih sawiin, tun sorkar-ah hian thleng ve lo se an duh tih a sawi bawk.

Zuk leh hmuam hi insim loh chuan cancer a la

Serchhip 2nd March 2010 : Rev.Cheryl Schang, Vice President Global Outreach, Jewish Voice Ministries chuan, Mizote chu zuk leh hmuam insim loh chuan cancer vei inla pung zel ang a ti.
He thu hi nimina DC’s Conference hall-a Serchhipa thutharla khawmtute a kawmnaah sawiin, Rev.Cheryl Schang chuan Mizo zingah zuk leh hmuam a hluar hle a, zuk leh hmuam hian cancer a thlen avangin a ti mek ten an sim loh chuan tun aia nasa hian cancer hi a la hluar thei a ni a ti a. A bikin kuhva chuan pumpui natna a thlen avangin thil tha lo tak a ni a ti a. Tun tuma Serchhipa damlo inentirna an buatsaihah pawh pum lam tha lo natna nei an tam ber a ni a ti.
Zawhna chhangin, Rev.Cheryl Schang chuan Mizote chu Israel-in Israel hnam pakhat nia an ngaih avanga damlo inentirna te pawh rawn buatsaih thin an ni tih a sawi a ni.
Jewish Voice Ministries buatsaiha a thlawna damlo inentirna Serchhip DC office tuala buatsaih hi mipuiin an hlut hle a. Doctor thiam bikna nei mi 8 ten damlo sang chuang en hman an tum a, nimin pawh khan mi 500 chuang an en hman a. Serchhipa hun an hman zawh hnu hian Saitualah an hmang leh dawn a ni.